କଲେଜ ନିର୍ବାଚନ ବିବାଦକୁ ନେଇ ବିଜେଡିର ଧାରଣା
admin
ଗୋବିନ୍ଦପାଲ୍ଲୀରେ ଏନ୍ଏଚ୍-୩୨୬ ଅବରୋଧ, ପୁଲିସ ହସ୍ତକ୍ଷେପ ପରେ ହଟିଲା ରାସ୍ତାରୋକ
ମାଥିଲି ୧୦/୧୦ ମାଲକାନଗିରି ଜିଲ୍ଲା ଖଇରପୁଟ ବ୍ଲକ ଅନ୍ତର୍ଗତ ଗୋବିନ୍ଦପାଲ୍ଲୀସ୍ଥିତ ବିଜୁ ପଟ୍ଟନାୟକ ଡିଗ୍ରୀ କଲେଜର ଛାତ୍ର ସଂସଦ ନିର୍ବାଚନକୁ କେନ୍ଦ୍ର କରି ଦେଖାଦେଇଥିବା ବିବାଦକୁ ନେଇ ରାଜନୈତିକ ଉତ୍ତେଜନା ପ୍ରକାଶ ପାଇଛି। ନିର୍ବାଚନ ପ୍ରକ୍ରିୟାରେ ପାତରଅନ୍ତର ଓ ଜଣେ ଆଶାୟୀ ପ୍ରାର୍ଥୀଙ୍କ ନାମ ବାଦ୍ ପଡ଼ିଥିବା ଅଭିଯୋଗ କରି ବିଜୁ ଜନତା ଦଳ (ବିଜେଡି) ପକ୍ଷରୁ ଶନିବାର ଧାରଣା ଦିଆଯାଇଥିଲା। ଏହି ଆନ୍ଦୋଳନ ସମୟରେ ୩୨୬ ନମ୍ବର ଜାତୀୟ ରାଜପଥ ଅବରୋଧ ହେବାରୁ ମାଲକାନଗିରି–କୋରାପୁଟ ମଧ୍ୟରେ ଯାତାୟାତ ବାଧାପ୍ରାପ୍ତ ହୋଇଥିଲା।
୭୫ ପ୍ରତିଶତ ଉପସ୍ଥାନକୁ ନେଇ ବିବାଦ
ସୂଚନା ଅନୁଯାୟୀ, କଲେଜ ଛାତ୍ର ସଂସଦ ନିର୍ବାଚନ ପାଇଁ ନାମାଙ୍କନ ଓ ଯାଞ୍ଚ ପ୍ରକ୍ରିୟା ସମୟରେ ଜଣେ ଆଶାୟୀ ପ୍ରାର୍ଥୀଙ୍କ ନାମ ପ୍ରାର୍ଥୀ ତାଲିକାରୁ ବାଦ୍ ଦିଆଯାଇଥିବା ଅଭିଯୋଗ ଉଠିଛି। ସମ୍ପୃକ୍ତ ପ୍ରାର୍ଥୀଙ୍କ ଉପସ୍ଥାନ ୭୫ ପ୍ରତିଶତରୁ କମ୍ ଥିବା ଦର୍ଶାଇ କଲେଜ କର୍ତ୍ତୃପକ୍ଷ ତାଙ୍କ ନାମ ବାଦ୍ ଦେଇଥିବା କୁହାଯାଉଛି। ଅନ୍ୟପକ୍ଷରେ, ଅନଲାଇନ୍ ରେକର୍ଡରେ ଅଧିକ ଉପସ୍ଥାନ ଥିବା ଦାବି କରିଛନ୍ତି ସମ୍ପୃକ୍ତ ପ୍ରାର୍ଥୀଙ୍କ ପକ୍ଷ।
ଏହି ଘଟଣାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇବା ସହ ବିବାଦ ରାଜନୈତିକ ରୂପ ନେଇଛି। ଅଭିଯୋଗର ନିରପେକ୍ଷ ତଦନ୍ତ କରିବା ସହ ଉଚିତ ନ୍ୟାୟ ପ୍ରଦାନ ଦାବିରେ ବିଜେଡି ନେତା ଓ କର୍ମୀମାନେ ରାସ୍ତାକୁ ଓହ୍ଲାଇଥିଲେ।
ରାଜପଥ ଅବରୋଧ, ଯାତାୟାତ ବାଧାପ୍ରାପ୍ତ
ପ୍ରତିବାଦକାରୀମାନେ ଜାତୀୟ ରାଜପଥ ଅବରୋଧ କରିବାରୁ ରାସ୍ତାର ଉଭୟ ପାର୍ଶ୍ୱରେ ଯାନବାହନ ଅଟକି ରହିଥିଲା। ଫଳରେ ମାଲକାନଗିରି ଓ କୋରାପୁଟ ମଧ୍ୟରେ ଯାତାୟାତ କରୁଥିବା ଯାତ୍ରୀ ଏବଂ ଅନ୍ୟାନ୍ୟ ଲୋକେ ଅସୁବିଧାର ସମ୍ମୁଖୀନ ହୋଇଥିଲେ।
ଖବର ପାଇ ପୁଲିସ ଫୋର୍ସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲା। ବୁଝାସୁଝା ପରେ ରାସ୍ତା ଅବରୋଧ ହଟାଯାଇଥିବା ବେଳେ ଘଟଣାର ତଦନ୍ତ ଆରମ୍ଭ କରାଯାଇଥିବା ପୁଲିସ ପକ୍ଷରୁ କୁହାଯାଇଥିଲା।
ବିଜେଡି ନେତା ଓ ଜନପ୍ରତିନିଧିଙ୍କ ଯୋଗଦାନ
ଏହି ପ୍ରତିବାଦ କାର୍ଯ୍ୟକ୍ରମରେ ଜିଲ୍ଲା ପରିଷଦ ଅଧ୍ୟକ୍ଷ, ବିଜେଡି ଜିଲ୍ଲା ଯୁବ ସଭାପତି, ଖଇରପୁଟ ବ୍ଲକ ବିଜେଡି ନେତା ଶ୍ରୀନିବାସ ମୁଦୁଲି, ଜିଲ୍ଲା ପରିଷଦ ସଭ୍ୟ ବଳି ମାଝୀ, କୁଡୁମୁଲୁଗୁମ୍ମା ଅଞ୍ଚଳର ବରିଷ୍ଠ ବିଜେଡି ସଦସ୍ୟ ଗପି ପାଙ୍ଗୀ, ମାଥିଲି ବ୍ଲକର ଜୋନ୍ ନମ୍ବର ୧ ଜିଲ୍ଲା ପରିଷଦ ସଭ୍ୟା ଲକ୍ଷ୍ମୀପ୍ରିୟା ନାୟକ ଏବଂ ଜୋନ୍ ନମ୍ବର ୩ର ଜିଲ୍ଲା ପରିଷଦ ସଭ୍ୟା ସସ୍ମିତା ମାଝୀଙ୍କ ସମେତ ବହୁ ଦଳୀୟ ନେତା ଓ କର୍ମୀ ଉପସ୍ଥିତ ରହି ଆନ୍ଦୋଳନକୁ ସମର୍ଥନ ଜଣାଇଥିଲେ।
ଛାତ୍ର ସଂସଦ ନିର୍ବାଚନରେ ଉଠିଥିବା ଅଭିଯୋଗର ନିରପେକ୍ଷ ତଦନ୍ତ, ନିୟମ ଅନୁଯାୟୀ ନିଷ୍ପତ୍ତି ଗ୍ରହଣ ଏବଂ ସମ୍ପୃକ୍ତ ପ୍ରାର୍ଥୀଙ୍କୁ ନ୍ୟାୟ ପ୍ରଦାନ କରିବାକୁ ବିଜେଡି ଦାବି କରିଛି। ଅନ୍ୟପକ୍ଷରେ, ଘଟଣାର ତଦନ୍ତ ପରେ କଲେଜ କର୍ତ୍ତୃପକ୍ଷ କି ପଦକ୍ଷେପ ଗ୍ରହଣ କରୁଛନ୍ତି, ତାହା ଉପରେ ଏବେ ସମସ୍ତଙ୍କ ନଜର ରହିଛି।
(ମାଥିଲି ରୁ ପ୍ପେଶାଲ ରିପଟର ଶିବପ୍ରସାଦ ପରିଛା ବିଶେଷ ଖବର)
