ମୁନିଗୁଡାରେ ଜିଲ୍ଲାପାଳଙ୍କ ଏସଆଇଆର ସମୀକ୍ଷା 28 ସୁଦ୍ଧା ଶତପ୍ରତିଶତ ସାରିବାକୁ ତାଗିଦ୍।

admin1 admin1
Jun 24, 2026 - 16:45
10
ମୁନିଗୁଡାରେ ଜିଲ୍ଲାପାଳଙ୍କ ଏସଆଇଆର ସମୀକ୍ଷା 28 ସୁଦ୍ଧା ଶତପ୍ରତିଶତ ସାରିବାକୁ ତାଗିଦ୍।

ମୁନିଗୁଡାରେ ଜିଲ୍ଲାପାଳଙ୍କ ଏସଆଇଆର ସମୀକ୍ଷା 28 ସୁଦ୍ଧା ଶତପ୍ରତିଶତ ସାରିବାକୁ ତାଗିଦ୍। ......................................... ମୁନିଗୁଡା, 23/06 /2026( ଲଷ୍ମୀ କାନ୍ତ ବେହେରା) ରାଜ୍ୟ ସରକାରଙ୍କ ଗୁରୁତ୍ୱପୂର୍ଣ୍ଣ ବିଶେଷ ସଘନ ସଂଶୋଧନ (ଏସଆଇଆର) କାର୍ଯ୍ୟକ୍ରମର ଅଗ୍ରଗତି ସମୀକ୍ଷା ନିମନ୍ତେ ରାୟଗଡା ଜିଲ୍ଲାପାଳ ଆଶୁତୋଷ କୁଲକର୍ଣ୍ଣି ସୋମବାର ଦିନ ମୁନିଗୁଡା ବ୍ଲକ ଗସ୍ତ କରିଛନ୍ତି। ତାଙ୍କ ସହିତ ଅତିରିକ୍ତ-ଜିଲ୍ଲାପାଳ ରମେଶ ଚନ୍ଦ୍ର ନାୟକ ମଧ୍ୟ ଉପସ୍ଥିତ ଥିଲେ। ଏହି ଅବସରରେ ମୁନିଗୁଡା ବିଡିଓ କୃଷ୍ଣଚନ୍ଦ୍ର ଦଳପତି ଓ ତହସିଲଦାର ଏମ୍. ଅନୁରାଧା ପ୍ରମୁଖ ଉପସ୍ଥିତ ରହି ଦୀର୍ଘ ଚାରି ଘଣ୍ଟାରୁ ଉର୍ଦ୍ଧ ସମୟ ଜିଲ୍ଲାପାଳ ଶ୍ରୀ କୁଲକର୍ଣ୍ଣି ବ୍ଲକର ସମସ୍ତ 77 ଜଣ ବୁଥ୍ ସ୍ତରୀୟ ଅଧିକାରୀ (ବିଏଲଓ)ଙ୍କ ସହ ମାରାଥନ ବୈଠକ କରି କ୍ଷେତ୍ରସ୍ତରୀୟ ଅଗ୍ରଗତିର ସମୀକ୍ଷା କରିଥିଲେ। ପ୍ରତ୍ୟେକ ବିଏଲଓଙ୍କ ଅଞ୍ଚଳରେ ଏସଆଇଆର କାର୍ଯ୍ୟ କିପରି ଚାଲିଛି, ଏଯାବତ କେତେ ପ୍ରତିଶତ କାର୍ଯ୍ୟ ସମ୍ପୂର୍ଣ ହୋଇଛି ଏବଂ କେଉଁ ସ୍ଥାନରେ କି ପ୍ରକାର ସମସ୍ୟା ଉପୁଜୁଛି, ତାହାର ତନ୍ନତନ୍ନ ଯାଞ୍ଚ କରାଯାଇଥିଲା। ସରକାରଙ୍କ ନିର୍ଦ୍ଧାରିତ ସମୟସୀମା ଜୁନ୍ 28 ତାରିଖ ସୁଦ୍ଧା ଶତପ୍ରତିଶତ ଲକ୍ଷ୍ୟ ହାସଲ ପାଇଁ ଜିଲ୍ଲାପାଳ କଡା ନିର୍ଦ୍ଦେଶ ଜାରି କରିଛନ୍ତି। ଯେଉଁ ବିଏଲଓମାନଙ୍କର କାର୍ଯ୍ୟ ଅଗ୍ରଗତି 80 ପ୍ରତିଶତରୁ କମ୍ ରହିଛି, ସେମାନଙ୍କ ପାଖରେ ଜିଲ୍ଲାପାଳ ନିଜେ ବସି କାର୍ଯ୍ୟକୁ ତ୍ୱରାନ୍ୱିତ କରିବାକୁ ପରାମର୍ଶ ଦେଇଛନ୍ତି। ଧାର୍ଯ୍ୟ ସମୟରେ କାର୍ଯ୍ୟ ଶେଷ ନହେଲେ ଉତ୍ତରଦାୟିତ୍ୱ ନିର୍ଦ୍ଧାରଣ କରାଯିବ ବୋଲି ସେ ସ୍ପଷ୍ଟ ଚେତାବନୀ ଦେଇଛନ୍ତି। ସମୀକ୍ଷା ସମୟରେ ଜିଲ୍ଲାପାଳ ବିଏଲଓମାନଙ୍କଠାରୁ କ୍ଷେତ୍ରସ୍ତରୀୟ ବାଧାବିଘ୍ନ ସମ୍ପର୍କରେ ଶୁଣିଥିଲେ ଏବଂ ତାହାର ତୁରନ୍ତ ସମାଧାନ ପାଇଁ ବିଡିଓ ଓ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଘରକୁ ଘର ବୁଲି ତଥ୍ୟ ସଂଗ୍ରହ, ଡାଟା ଏଣ୍ଟ୍ରି ଏବଂ ସତ୍ୟାପନ କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ ତ୍ୱରାନ୍ୱିତ କରିବାକୁ ସେ ଗୁରୁତ୍ୱାରୋପ କରିଥିଲେ। ଏହି ମହତ୍ କାର୍ଯ୍ୟକ୍ରମକୁ ସଫଳ କରିବା ପାଇଁ ଜନସାଧାରଣଙ୍କ ସକ୍ରିୟ ସହଯୋଗ ଲୋଡି ସେ ଆହ୍ୱାନ ଜଣାଇଛନ୍ତି। ବୈଠକ ଶେଷରେ ଉପସ୍ଥିତ ସମସ୍ତ ଅଧିକାରୀ ଓ ବିଏଲଓମାନେ ଜୁନ୍ 28 ସୁଦ୍ଧା ଶତପ୍ରତିଶତ ଏସଆଇଆର କାର୍ଯ୍ୟ ସମାପ୍ତ କରିବାକୁ ଜିଲ୍ଲାପାଳଙ୍କୁ ଦୃଢ଼ ପ୍ରତିଶ୍ରୁତି ପ୍ରଦାନ କରିଛନ୍ତି। ପ୍ରଶାସନର ଏହି ତତ୍ପରତା ଦେଖି ନିର୍ଦ୍ଧାରିତ ସମୟସୀମା ମଧ୍ୟରେ କାର୍ଯ୍ୟ ସମ୍ପୂର୍ଣ୍ଣ ହେବ ବୋଲି ଆଶା ସୃଷ୍ଟି ହୋଇଛି। ଏହାଦ୍ୱାରା ଭୋଟର ତାଲିକାର ସ୍ୱଚ୍ଛତା ସହିତ ସରକାରୀ ଯୋଜନାର ସଠିକ୍ କାର୍ଯ୍ୟାନ୍ୱୟନ ଦିଗରେ ଏକ ନୂତନ ଅଧ୍ୟାୟ ସୃଷ୍ଟି ହେବ।